Дождовите и ниските утрински температури носат ризик – Полицијата апелира за внимателност

Дождовите изминатите неколку денови и ниските утрински температури, покрај другото, причинуваат  влажни коловози и отежнато движење на возилата, особено на високoпланинските патишта во Полог и пред се по долината на Радика, најчесто доцнавечер и во раните утрински часови. Доколку позначително се спуштат утринските температури, на овие патишта можна е појава и на голомразица, како и одрони од камења, кои дополнително го зголемуваат ризикот за сообраќајни несреќи.

Поради ова, Секторот за внатрешни работи Тетово апелира до возачите да бидат крајно внимателни, особено ако патуваат кон Стража, Маврово или Попова Шапка и да ја прилагодат брзината според условите на патот.

„На возачите им се советува, исто така, навреме да ја проверат техничката исправност на нивните возила, а посебно оние кои вршат јавен превоз на патници со автобуси и комбиња, да не консумираат алкохол кога управуваат возило и да не управуваат  неподготвени и заморени. Полициските службеници на Секторот за внатрешни работи Тетово континуирано спроведуваат и во наредниот период ќе продолжат со засилени контролни активности, во чие средиште ќе биде техничката исправност, односно неисправност на возилата, брзината со која се движат во и надвор од населените места, управувањето без возачки дозволи и возилата со истечена регистрација. Техничките неисправните ќе се исклучуваат од сообраќај и ќе следуваат соодветни поднесоци, како и на оние без дозволи, на нерегистрираните возила и пребрзите и алкохолизираните возачи.“, апелираат од СВР Тетово.