Државата да ни обезбеди домови, бараат семејствата од изгорените бараки во Гостивар

Семејствата кои останаа без покрив над главата, откако им изгореа бараките на ул „Илинденска“ во Гостивар, бараат помош од институциите.

Општина Гостивар им обезбеди привремено сместување, Црвениот Крст донира хуманитарни пакети, а народната кујна на организацијата Дава се обврза да го покрие делот со храната.

Семејствата велат дека секоја помош е добредојдена, но бараат трајно решавање на домувањето за да можат да си ги создаваат основните услови за живот.

„Вечерта кога се случи пожарот животот ми го спасија соседите. Едвај спасивме жива глава и се ни остана внатре, изгоре. Молиме за помош, општината, главните во труд и социјала, во СИЗ-от, да ни дадат покрив над главата. Јас живеам од социјална помош, не стигнува струја да платам, да купам лекови и леб. Како сега и каде да одам“, рече една од станарките Елизабета Бошкова.

Во бараките живеела и Шемсие Абази, која со солзи во очите зборуваше за страотната вечер: „Да ги замолам сите кој сака да помогне. Се‘ се стори пепел, не ми остана ни здравствената книшка, ни лековите, а имав тешка операција. Ништо не можев да спасам, ни на лекар сега не можам да одам. Да не беше соседот да скрши врата, да ме изнесе надвор, сега ќе ме најдевте изгорена.“

Друг станар, Сенад Абдији рече дека привременото сместување не може да биде решение и дека државата треба да им даде дом: „Немаме ништо, немаме покрив над главата. Општината не смести во хотел, но тоа ќе биде неколку дена. Рекоа дека ќе имаат состанок да видат, што, како понатаму. Ама, јас не сакам ќирија да ми плаќаат некаде, тоа ќе биде за 2-3 месеци и што после. Сакам да ми се обезбеди стан. Имам болна мајка, татко ми е стар човек, а се‘ ни изгоре.“

Пожарот се случи во недела рано наутро околу 4 часот. Пламените јазици многу брзо се прошириле во објектите и ги проголтале.