Во Маврово уште 26 лица се во државен карантин

Неколку хотели во Маврово изминатиот период беа државен карантин за граѓани дојдени од странство преку организираните летови. На последната група од 26 лица државниот карантин им истекува во понеделник, на 4 мај.

„Откако ќе истече државниот карантин, лицата ќе бидат испратени дома. Инаку, имаме десетина лица кои се жители на нашата општина, а се во државен карантин во други места, најмногу во Струга. Тие ќе останат таму три недели бидејќи допатувале од високоризични странски земји“, информираше градоначалникот на Општина Маврово Ростуше, Медат Куртовски.

Мавровскиот регион традиционално е место каде голем број на граѓани ги поминуваат првомајските излети. Годинава со оглед на пандемијата и забраните за движење за продолжениот викенд, излетниците ќе изостанат или ќе бидат поретки. Сепак, како и за велигденскиот карантин, и за овој празничен викенд се очекува во Маврово да престојуваат сопствениците на викендички.

Од тамошната локална самоуправа упатија апел сите доследно да ги почитуваат  препораките и мерките за заштита од ширење на Ковид 19. „Не можеме да им забраниме да доаѓаат на граѓаните кои во Маврово имаат викендици, тие фактички си доаѓаат на свој имот, дома. Но, упатуваме апел да ги почитуваат мерките и полицискиот час. Во Маврово има продавници и ресторани од каде може да се нарача храна и други потребни продукти и за време на забрана за движење“, рече Куртовски.

На територијата на општина Маврово Ростуше до сега не е регистриран ниту еден случај на заболен од коронавирус