ДУИ Гостивар: Дива депонија и во Здуње, по победата ќе ги исчистиме сите и ќе го решиме Русино

Кандидатот за советник од листата на ДУИ за Гостивар, Газменд Рамадани, придружуван од други кандидати за советници, денес одржа прес конференција на локација во атарот на селото Здуње.

„Веќе обелоденивме дека има дива депонија кај Чегране, денес обелоденуваме уште една дива депонија, овојпат во селото Здуње. Сведоци сме дека се создадени диви депонии речиси во секоја населба на територијата на Гостивар, додека во депонијата Русино отпад фрлаат сите општини од Полог. Не сме против соседните општини, но Русино не исполнува никакви стандарди и ние не можеме да дозволиме нашите населби да се претворат во диви депонии. Таравари не успеа да најде решение за Русино и стимулира создавање на диви депонии слични на Русино. Бидејќи е само уште една недела на чело на општината нема да апелираме да преземе мерки за чистење на дивите депонии, затоа што нема време. Меѓутоа ДУИ на чело со новиот градоначалник Невзат Бејта, по победата на 17 октомври имајќи ја предвид алармантната состојба на терен, највисок приоритет ќе даде на итно започнување на чистење на дивите депонии како и трајно решение на депонијата Русино.“, истакна Рамадани.