ДУИ: Партиите кои денеска го фалеа проектот за Коридор 8, до вчера го критикуваа договорот со закани дека ќе го откажат

Демократската унија за интеграција денеска излезе со соопштение врзано со проектот за изградба на Коридор 8, кадешто претпладнево на увид на работите беше премиерот Христијан Мицкоски.

„Цениме дека продолжувањето на работите на Коридорот 8 дури и од страна на Владата без етнички легитимитет ја докажува и потврдува нашата правична и визионерска политика. Партиите кои денеска го фалеа и се гордееа со проектот, до вчера го критикуваа договорот и изградбата на Коридорот 8 со закани дека ќе го откажат договорот, а денеска го нарекоа историски проект. Граѓаните секојдневно ги чувствуваат придобивките од нашите политики и се убедени дека целиот политички лов на вештерки со клевети и конструкции беше измама за да се дојде на власт, дури и без етнички легитимитет. Коридорот 8, иако го носи печатот на ДУИ, е на сите граѓани и апелираме тунелот од Гостивар до Букојчани да се реализира бидејќи тоа е најдобрата и најрационална опција за овој дел од коридорот.“, стои во соопштението од ДУИ.

Од партијата посочуваат дека предвидениот буџет за овој проект мора да се реализира како што е утврден за да, како што велат, нема намерни опструкции и политички доцнења во реализацијата на проектот.