ДУИ возвраќа: Таравари го клевети УО на Комуналец за да сокрие скандал

Закачките во Гостивар на релација ДУИ – градоначалник, не престануваат. Откако вчера се зафатија со урбанизмот и дозволите за градба, војната денес продолжува со случувањата во јавното претпријатие „Комуналец“.

Градоначалникот Арбен Таравари посочи дека управниот одбор на претпријатието избран од ДУИ и СДСМ не го изгласал тримесечниот извештај на директорот намерно, за да ја блокира работата и зафатите кои се важни за Комуналец.  Од ДУИ пак потенцираат дека со ова обвинување, градоначалникот се обидува да прикрие скандал.  „Се работи за трошоци направени за привремени вработувања, за што за само шест месеци се потрошени над 13 милиони  денари и се ангажирани над 144 вработени со договор на дело, бројка која ги надминува и редовните вработувања. Заради тоа, управниот одбор побара од директорот на Јавното претпријатије Комуналец, писмен извештај за сите вработени по договор на дело: дали се пријавуваат на работа, на кое работно место се систематизирани, каде дават извештај за сработеното и слично, за да не се случи некој да зема висока плата, а да не оди на работа.“, стои во соопштението од ДУИ.

Од партијата додаваат дека претпријатието бележи и зголемени трошоци за гориво, амортизација и други нерегуларности за кои наведуваат дека ќе ја информираат јаноста во следниот период.

„Таравари треба да знае дека злоупотреби на јавните пари и трошење на нетранспарентен начин за да се наградат политички војници, нема да поминат. Таквите случаи, ќе бидат обелоденети јавно и ќе следаат адекватни постапки пред надлежните институции.“ наведуваат од ДУИ.