Дури 115 гостиварци фатени зад волан без возачка дозвола

Сообраќајната полиција и покрај интензивните контроли, не успева да ги доведе во ред возачите во Гостивар. И натаму се возат нерегистрирани автомобили, технички неисправни, а особено загрижувачко е што расте бројот на оние кои седнуваат зад волан без положен испит.

Статистиката за минатиот месец покажува дека биле откриени дваесетина неисправни и 83 нерегистрирани возила по гостиварските улици. Сопствениците добиле соодветни пријави и законски предвидени глоби.
Во април евиденитирани се дури 115 лица кои ги управувале возилата без положен возачки испит и валидна дозвола. Од СВР укажуваат дека оваа појава продолжува и покрај бројните превентивно-контролни мерки и активности што ги преземаат полициските службеници од Полициска станица во Гостивар. Несовесните возачи не ги плашат ни високите казни за овој вид прекршок кои изнесуваат 300 евра за тој што вози и плус 400 евра за сопственикот на возилото.
Нема подобрувања ниту во однос на погрешното паркирање . Бројката од триесетина непрописно паркирани, потврдува дека поединци не се придржуваат на знаците и прописите, кои го регулираат паркирањето во Гостивар, посебно на сообраќајно најфрекфрентните улици во централното подрачје, посочуваат надлежните.
За сите видови на прекршувања, сообраќајците во април изготвиле вкупно 442  платни налози.