Два екстерни и 1 интерен испит – конечен договор за државната матура

Премиерот Зоран Заев и претседателот на Сојузот на средношколци, Бленди Ходаи на заедничка прес конференција денес соопштија дека е постигнат конечен договор за полагањето на државната матура. Ќе има 2 екстерни и 1 интерен испит, а ќе се формира и работна група за скратување на програмата за екстерните испити.

„Се договоривме за два екстерни испита, додека за третиот се договоривме да се трансформира во интерен испит. Вака ниту еден матурант нема да има проблем да се запише на еден од престижните домашни или странски универзитети“, рече Заев.

Почетниот датум на полагање на државната матура се поместува на 5-ти јуни. Ходаи ги кажа договорените решенија што треба да се спроведат.

„Работната група треба да ја заврши својата работа најдоцна до март, материјалите за испитите да им бидат достапни на учениците најмалку три недели пред испитот, а банките со прашања да содржат најмалку 60, а најмногу 100 прашања. Првиот екстерен испит, мајчин јазик, да биде сметан за соодветен од страна на сите високообразовни институции.“, изјави Ходаи.