Дваесетина фирми од Гостивар ќе добијат државни пари за нови вработувања

Приватниот сектор во Гостивар покажа значителен интерес за користење на средства од државата наменети за отворање на нови работни места. На огласот за поддршка на раст на мали и средни претпријатија и вработување, пријави поднеле 48 фирми. Рокот за аплицирање заврши на 11 април, а периодов службите ја проверуваат документацијата на барателите, по што ќе следува селекцијата на оние кои ќе добијат поддршка.

Зависно од возраста на лицето што ќе го вработат, претпријатијата може да добијат 1.500 или 2.500 евра.

„Правните субјекти кои сакаат да вработат кандидат под 29  годишна возраст добиваат по 2.500 евра, додека за кандидати над 29 години сумата е 1.500 евра, со услов понатаму да ги задржат на работа. За оние над 29 години обврската е девет месеци, а за тие под 29 години, една година. Интересот беше голем и за таа мерка аплицираа 48 правни субјекти за вработување на 52 лица.“, рече Хисан Амзаи, директор на Центарот за вработување во Гостивар.

Преку мерката за поддршка на раст на мали и средни претпријатија и вработување на ниво на држава пари ќе бидат доделени на 262 фирми, а од подрачјето на Гостивар на 20 до 25.

Во следниот период се очекува да се отвори и огласот за субвенционирање на плати.