Дваесетина газди во Гостивар зеле државна помош, но не им дале плати на работниците

Злоупотребите на државната помош наменета за исплата на плати продолжуваат. Во октомври 179 работодавачи во земјава, кои ја користеле мерката за финансика помош, не им исплатиле плати на вработените. Се работи за 338 работници, со вкупна дадена помош од 5,3 милиони денари. Најголемиот дел од фирмите кои зеле помош, а ги оставиле вработените без плата, се од Скопје (52 фирми), од Тетово (41 фирма), а од Гостивар се 21 фирма.

„Секој кој го прекршил законот ќе одговара пред законот, можеби санкциите се премеки, но ние како УЈП укажуваме дека спроведувањето на присилната наплата се одвива сега, а тоа и ќе продолжи. Исто така, дадени им се налози на инспекторите од УЈП и трудовите инспектори – да го испитаат и целото работење на овие компании. Потребни се построги мерки, но очекуваме и дека јавното објавување на газдите неплаќачи ќе вроди плод“, изјави на денешната прес конференција, Сања Лукаревска, директорка на УЈП.

Листата на работодавачи кои се уште не ги исплатиле платите треба да го објави Генералниот секретаријат на Владата. Казната изнесува од 500 до 1.000 евра за помалите фирми, и меѓу 1.000 и 10.000 евра за големите компании.