Двајца од групата којашто работеше кај црквата „Св.Петка“ приведени во зградата на Општина Врапчиште

Случувањата околу покренатата акција за уредување на црквата „Св.Петка“ во атар на Галате не стивнуваат. Попладнево, полицијата приведе две лица, дел од групата што викендов работеше на средување на просторот околу храмот. Приведувањето се случи во објектот на Општина Врапчиште, кадешто граѓаните беа дојдени и инсистираа да остварат средба со градоначалникот Исен Шабани. Тие претходно на влезот на општината ја поставија лентата од градежна инспекција, која пак ја отстранија од локацијата кај црквата.

Информација за причините поради кои се приведени се очекуваат од МВР.

Во меѓувреме стигна реакција од Алијанса за Албанците, партијата во која членува врапчишкиот градоначалник. Од таму нагласуваат дека Шабани ги прекинал незаконските работи во црквата во Галате, а ВМРО поттикнувала тензии и дестабилизација.

„Залетот на моноетничката и антиалбанската Влада да засади крстови и цркви во секое населено место, узурпирајќи го јавното земјиште и без потребните дозволи и документација, е еден од најопасните облици што им наштетуваат на меѓуетничките односи и предизвикуваат тензии во државата. Откако градоначалникот на Општина Врапчиште, Исен Шабани и општинскиот инспекторат ги прекинаа незаконските работи и узурпацијата на земјиштето кај црквата кај Галате, ВМРО мобилизираше милитанти од Гостивар и го блокираа објектот на општина Врапчиште, заканувајќи му се и загрозувајќи го градоначалникот. Дали е ова уште еден доказ дека Мицковски и неговите партнери сакаат сценарија за дестабилизација по секоја цена?“

Тензиите започнаа викендов откако граѓани се организираа да спроведат акција за уредување на црквата „Св.Петка“ и околниот простор. Активностите биле прекинати од полицијата, за што МВР даде образложение дека се постапувало по пријава за незаконски градежни работи од страна на инспектор за урбанизам од општина Врапчиште.