Две децении од убиството на гостиварците Даил и Александар

Со комеморативен собир утрово беа одбележани дваесет години од трагичната смрт на полициските резервисти Даил Јанкоски и Александар Николиќ од Гостивар. Собирот, како и секоја година се одржа на влезот во гостиварската населба Циглана, на местото кадешто беа убиени во 2002-ра, во присуство на семејствата, роднини, пријатели, колеги и претставници на политички партии.

Од страна на светшеници на гостиварското архиерејско намесништво беше одржана панихида, а присутните запалија свеќи и со минута молчење им оддадоа почит на хероите.

Буќети цвеќе положија делегации на ОВР Гостивар, синдикатот на полицијата, Здружението на бранители, ОК на ВМРО ДПМНЕ и ОО на СДСМ.

По комеморативниот собир во Циглана, блиските ги посетија и нивните вечни почивалишта.

Гостиварците Јанкоски и Николиќ, беа убиени на должност на полициски пункт на влезот од населбата Циглана во 2002 година на 26 август еден часот по полноќ. На нив пукале непознати лица со автоматски пушки од возило во движење со странски регистарски таблички.

На местото на трагедијата во чест на загинатите резервисти во 2012 година беше поставена спомен плоча.