Две момчиња од Гостивар повредени утрово во сообраќајна несреќа – паднале во провалија со мотор

Две лица, на возраст од 17 и 19 години завршиле со тешки телесни повреди во сообраќајна несреќа која се случила утрово на регионалниот пат Долна Ѓоновица-Гостивар, близу некогашната сушичка депонија.

Според информациите од портпаролот на СВР Тетово, Марјан Јосифоски моторцикл без регистрација, кој го управувал 17 годишник од гостиварската населба Циглана движејќи се по патот, од засега непознати причини изгубил контрола, излетал од коловозот и паднал во бездна. Возачот на моторот и сопатникот на возраст од 19 години, се здобиле со тешки телесни повреди. Седумнаесетгодишникот по добиената медицинска помош е задржан на лекување во гостиварската општа болница, додека другото момче е префрлено на клиниките во Скопје.

Полицијата соопшти дека е извршен увид и се утврдуваат причините и околностите кои довеле до несреќата.