Две сообраќајки со повредени на гостиварските патишта

Вчерашниот неделен ден помина со сообраќајни несреќи во кои беа повредени повеќе лица.

Според информациите од СВР, на магистралниот пат Гостивар-Кичево, во близина на Здуњскиот мост на Вардар, околу 16 часот и 30 минути се случила сообраќајна несреќа со учество на патничко возило „Цитроен“ со скопски таблици, управувано од 22-годишниот Д.Ц. од Скопје и товарно возило „Пежо“ со германски таблици, што го управувал 54-годишниот германски државјанин К.Д. Во судирот,  двајца сопатници од „Цитроенот“ завршиле со повреди. По укажаната лекарска помо едното лице било пуштено дома, а другото заради сериозноста на повредите пренесено на скопските клиники.

Втората несреќа е регистрирана во 18 часот и 30 минути, на железничката пруга на влезот во Гостивар. Во неа учествувале: дизел локомотива на „Македонски железници“, управувана од 48-годишниот Ј.Т. од Зелениково и патничко возило „Сеат леон“ со тетовски регистерски таблици, што го управувал 20-годишниот тетовец И.Б.

Во несреќата, тетовецот се здобил со лесни телесни повреди, со медицинско возило пренесен е во гостиварската болница и по укажаната лекарска помош, пуштен е дома.

По овластување на јавен обвинител извршен е увид и се расветлуваат сите поединости поврзани со несреќата. Првичните сознанија на полицијата се дека  причина е непочитување на сообраќаен знак. Материјалната штета се проценува на 150 илјади денари.