Две сообраќајки со повредени во гостиварско попладнево

Во текот на попладневите часови на поширокото гостиварско подрачје се случиле две сообраќајни несреќи, во кои повеќе лица се здобиле со повреди.

Според информациите од полицијата, во 16 часот и 15 минути на регионалниот пат Маврови Анови – Дебар, на стотина метри од браната се судриле два автомобила, „мицубиши“ со скопска регистрација и „поло“ со кичевска. Во несреќата жена на возраст од 47 години од Кичево, која се возела во полото, била потешко повредена. Таа била префрлена во гостиварската болница и по укажаната лекарска помош пренесена на скопските клиники. Во сообраќајката со полесни повреди се здобиле уште три лица, на кои откако им била пружена медицинска грижа во Гостивар биле пуштени дома. Полициска екипа извршила увид и се утврдуваат причините и околностите.

Втората несреќа е регистрирана во 18 часот и 30 минути на селски пат од селото Дебреше кон околна шума, во месноста викана „чук“. Џип „хујндаи“ со гостиварска таблица, кој го управувал 61 годишно лице од Дебреше, изгубил контрола, излетал од патот и завршил во провалија. Возачот со повреди бил пренесен во болницата во Гостивар, каде му е пружена медицинска помош. Во џипот имало и сопатник, на возраст од 23 години кој поминал со полесни повреди. Увид допрва ќе се врши поради непристапноста на теренот, соопштува полицијата.