Дводневни настани и свечености по повод 80 години слободен Гостивар

По повод 80 годишнината од конечното ослободување на Гостивар, ќе бидат организирани низа активности и свечености.

Како што најавуваат од организациониот одбор, одбележувањето ќе започне на 17 ноември (недела) во 11 часот, кога во градскиот парк ќе бидат засадени 80 дрвца, симболично за 80 години слободен Гостивар.

На самиот датум на ослободувањето, 18 ноември (понеделник) во 11 часот ќе има положување на цвеќе на споменикот на паднатите борци во НОВ. Потоа, во 12.30 часот во холот на ООУ „Гоце Делчев“ ќе се одржи музичко-сценска манифестација „Децата и младите за Гостивар“, со учество на децата од градинките и основците.

Централниот настан, Свечената академија ќе се одржи во Центарот за култура АСНОМ од 19 часот, додека пред тоа во фоајето на установата ќе има изложба на фотографии „Гостивар низ историјата“.

18-ти ноември за Гостивар е светол датум од историјата на Гостивар, испишан како Ден на конечното ослободување.

Ослободувањето на Гостивар го поготвија и извршија единиците на 15-тиот македонски корпус од 41 и 48 дивизија и 7-мата бригада на 49 дивизија. Во народно-ослободителната војна животот го загубиле 322 активни борци од гостиварскиот регион, како и 158 жртви на фашизмот.