Двојно зголемен бројот на спонтани абортуси во Гостивар

Драстичен пораст на спонтаните абортуси минатата година бележат гинеколозите во Гостивар. Речиси двојно повеќе трудници несакано ги загубиле бебињата, споредено со 2019-та. Ковид пандемијата има најголемо влијание врз ваквите црни резултати, сметаат лекарите. Нередовните прегледи поради страв од вирусот, стресот, па и самата болест ги наведуваат како едни од најчестите причини за спонтаните абортуси.

„Имаме зголемување на спонтаните абортуси, речиси двојно повеќе. Тоа се должи најверојатно на непосетување редовно матични гинеколози поради страв од ковид, има случаи и кога самите пациентки заболеле од ковид, целиот стрес од пандемијата и слично. Има повеќе причини, но факт е дека порастот на спонтаните аборти е голем“, рече д-р Агим Јакупи, раководител на гинекологија во Гостивар.

Податоците од гиеколошко-акушерското одделение во гостиварската болница покажуваат дека претходно се регистрирале по 30-тина спонтани абортуси на годишно ниво. Лани таа бројка надминала 55. Возраста на трудниците обично се смета за ризик фактор, но во ланските случаи не била потврдена поврзаност. „Кај повозрасни пациентки ризикот од спонтан абортус е поголем, но сепак не може да кажамеме дека така било во сите случаи, нема такво правило“, вели д-р Јакупи.

Контролите кај матичните гинеколози, трудниците би требало да ги прават редовно еднаш месечно. Контролните прегледи се особено важни за жените со ризична бременост, нагласуваат лекарите.