Дворовите на училиштата во Гостивар отворени за бесплатно паркирање

Дворните места на основните и средни училишта во Гостивар ќе се користат како паркинг простор, соопшти Секторот за внатрешни работи. Истото ќе се практикува и во дворовите на неколку училишта во Тетово. Овој чекор е преземен за да се овозможи нормален и проточен сообраќај во летниот период, кога со доаѓањето на печалбарите во родните краишта,  се зголемува и фреквенцијата во сообраќајот на полошкото подрачје.

„Секторот за внатрешни работи Тетово, во соработка со општините Тетово и Гостивар, како привремени паркинг простори, ќе ги пушти во употреба дворовите на училиштата на местата каде што има зголемена фрекфенција во сообраќајот. Во градското подрачје на Тетово граѓаните нивните возила можат да ги паркират во дворовите на средното училиште ,,Кирил Пејчиновиќ“, -Гимназија, кај старото медицинско училиште, како и кај основното училиште ,,Истикбал“. Во Гостивар, за оваа намена, привремено се ослободени за паркирање дворовите на сите основни и средни училишта, кои се наоѓаат во градот.“, наведуваат од полицијата.

СВР Тетово испрати апел до возачите, да ги користат овие привремени паркинг простори и возила да не ги паркираат каде што ќе стигнат, да ги почитуваат законските правила и прописи во сообраќајот, за да се овозможи нормален тек на сообраќајот. Казните за погрешно и непрописно паркирање се движат од 20 до 180 евра во денарска противвредност или порамнување со негативни поени.