ЕДЕН ДЕН СО : Трајче Богданоски, професор по физичко и кондиционен тренер

Кои се твоите утрински ритуали и навики?

Станувам рано наутро околу 6 часот, таа навика ми има останато уште од моите млади атлетски денови. Четириесет минути  до 1 час, претежно наутро одам да џогирам или правам аеробични вежби. Појадокот гледам секогаш да биде здрав, практикувам прво да изедам некое овошје. Обично првото еспресо знам да го испијам со моите пријатели.

Како тече еден твој работен ден?

Мојот работен ден е исполнет со тренинзи. Се подготвувам за тренинзите што ми следат во текот на денот било тоа да се индивидуални или екипни. Ја разгледувам програмата за работа и ако е потребно ги подготвувам и реквизитите што ми се потребни за тренинг. Тренинзите можат да бидат на стадион, фитнес или во сала. Често пати тренираме и по два пати во текот на денот. После одработениот утрински тренинг ги собирам информациите од тренингот и се подготвувам за вториот попладневен тренинг. Вака обично трае еден мој работен ден.

Со што го исполнуваш слободното време?

Слободното време најмногу сакам да го поминувам со семејството. Многу гледам спортски настани. Се дружам со пријателите. Сакам да се информирам од порталите. Исто така секое слободно време гледам да отпатувам некаде.

Без што не можеш да го замислиш својот живот?

Не можам да го замислам животот без спорт. Атлетиката е мојата љубов. Уште еднаш кога би бирал професија во животот повторно би ја избрал атлетиката.

Маратонот на Банката на Америка или Чикаго Маратон (2002). Еден од најпопуларните маратони во светот и кој е познат по својот рамен и брз тек, со повеќе од 40.000 учесници секоја година.

Каде се гледаш себе си за 10 години?

Од моето 30 годишно досегашно искуство во спортот секогаш се надоградував и мислам доволно созреав како тренер, а  тоа го докажуваат и резултатите што ги имам постигнато со некои спортисти на меѓународно ниво и тоа со спортисти од нашата држава. Неостварена желба ми е учество и медал на Олимписки игри и се надевам дека овој сон ќе ми се исполни.

Твој совет до читателите во однос на одржувањето кондиција и здравјето…

Спортувајте! Пешачете, џогирајте, возете велосипед, одете во фитнес пет пати во текот на неделата барем по 1 час во текот на денот. Убаво е да се има некоја активност.  Внимавајте на исхраната. Посетувајте доктор и редовно контролирајте го вашето здравје.