Еден ден со: Владимир Николоски, адвокат

Работно во канцеларија и суд, во слободно време со пиво или спорт

Утрински ритуали и навики

Се будам секој работен ден во 7 и 30 часот, некои посебни утрински ритуали додека сум дома немам. Преферирам како превозно средство во овие топли денови да го користам велосипедот. Откако ќе започнам со работниот ден, како утрински ритуал би го издвоил пиењето на утринското кафе заедно со моите колеги во канцеларијата, пропратено со читање на најмалку два дневни весници заради информирање за настаните од изминатиот ден. Во викендите, исто така станувам рано и моето утринско кафе го пијам во кафе барот Baby Blue, дополнето со пријатен разговор со персоналот на кафе барот.

Активности и обврски во работниот дел од денот

По утринското кафе, преминуваме кон подготовка за дневните закажани рочишта пред судот и разговарам со клиентите за тековните дневни судења. Во текот на работниот ден присуствувам на закажаните рочишта и по потреба одам до други државни и управни органи. Паузата најчесто ја користам од 12.30 до 13 часот, се разбира за доручек и второ кафе. Работниот дел од денот ми завршува во 16 и 30 часот. Нема ништо полесно од обично поминат работен ден.

Исполнување на слободното време

Во попладневните часови слободното време најчесто го исполнувам со спорт, како посетување на фитнес центар, играње кошарка, тенис. Исто така, два дена во неделата посетувам училиште за странски јазик. Во вечерните часови обожавам да излезам со моите пријатели во некое од гостиварските кафулиња, а бидејќи сум љубител на добро пиво, најпосетувано место ми е угостителскиот објект The Pub. Освен тоа, не испуштам да посетам добар концерт или театарска претстава, сметам дека ваквите настани влијаат позитивно и ни ги прошируваат мисловните хоризонти. Апелирам до младите да слушаат квалитетна музика.

 Откријте ни нешто од листата на неостварени желби

Отсекогаш сум имал желба да посетам некоја дестинација како Куба, Тајланд, Малдиви, Чиле. Се надевам дека оваа година макар една од тие ќе ми биде исполнета. Сепак, освен дестинацијата битно е со кого се патува и какво чувство носиме од тоа патување, затоа што спомените и чувствата се најтрајни. Што би рекле *Хладно пиво* – *Само за тај осечај*.

Омилен начин на одмор и релаксација

Според мене, омилен начин на одмор и релаксација подразбира добра сенка, плажа, пред тебе море или езеро, додека во воздухот се слуша некоја добра jazz музика.