Еден граѓанин годишно создава 376 килограми ѓубре

Државниот завод за статистика ги објави податоците кои се однесуваат на создавање, собирање и депонирање на комуналниот отпад во 2016-та година. Полошкиот регион е на второ место во земјава по количество на создаден комунален отпад, односно веднаш зад Скопскиот регион. Минатата година,  во полошко биле создадени 128.158 тони ѓубре, од кои собрани биле 92.127 тони.

Анализите покажуваат дека секој граѓанин во Македонија просечно годишно продуцира по 376 килограми ѓубре. Од него, најголем процент отпаѓа на измешан комунален отпад и на органски отпад како храна, лисја и слично. Не е занемарлива и количината на пластика и стакло кои се фрлаат. Така, лани биле собрани над 11 илјади тони хартија и над 10 илјади тони пластика.

Од вкупното количество на собран комунален отпад во цела Македонија, кое изнесува 610.227 тони, 84 % се собрани од домаќинствата, а останатите 16% од правни и физички лица (комерцијален отпад).