Едукативен проект на полицијата во градинките во Гостивар и Тетово

Секторот за внатрешни работи Тетово започна со практична реализација на нов превентивно-едукативен проект со наслов „Чекор по чекор“.

Со проектот, чиј иницијатор и носител е Отсекот за превенција при СВР Тетово, ќе бидат опфатени сите деца од предшколска возраст од тетовските и гостиварските градинки, а првото од серијата планирани предавања веќе се одржа во Гостивар.

„Стручно обучени полициски службеници децата ќе ги запознаат и со основните сообраќајни поими, начинот на однесување и движењето по улици и тротоари, како и каде на безбеден начин да ја преминуваат улицата. Покрај теоретскиот дел во соработка со нивните негувателки и воспитувачки, е предвидено изведување и на практичен дел“, информира СВР.