Еко акција во Гостивар-Чистење отпад и порака за поголема грижа за јавната хигиена

Гостивар и годинава се вклучи во националната еколошката активност „Генералка викенд“, што се спроведува низ општините во земјава. Утрово беа организирани акции за чистење на отпад во централното градско подрачје и во населбата Малеарди, од каде беа испратени пораки за поголема грижа на секој поединец и придонес во зачувување на животната средина.

Во акцијата учествуваше и градоначалникот на Гостивар, Ваљбон Лимани.

„Генералка викенд трет пат се одржува во Гостивар, во соработка со невладини организации, општествено одговорни приватни компании и двете јавни претпријатија. Ова е акција која е добредојдена за сите нас, но воедно и порака до сите наши граѓани-да се крене свеста кај нив и сите да се погрижиме Гостивар да биде почист и поубав град. Ја користам приликата да апелирам до нашите граѓани сите да се грижиме, службите да си ја вршат својата работа, се случува и тие понекогаш да имаат проблеми во работата од различни природи, но би потенцирал до граѓаните повеќе да се вклучат за нашиот град да биде почист и секако менаџирањето со отпадот да биде подобро“, рече градоначалникот.

Денешната акција општината ја спроведе во соработка со Црвен крст, „Позитива Б2“ од Вруток и организацијата „Мен енд маунтин“.

„Со особена благодарност ги истакнуваме нашите партнери: КК Гостивар, Младинска ЖКК Гостивар, Go Bikers Gostivar. Нивната несебична поддршка, учество и промоција на оваа акција се од огромно значење за успехот и заедничката порака – дека само заедно можеме да изградиме поодговорна и поздрава заедница. Со вакви заеднички иницијативи, испраќаме силна порака дека Гостивар знае, сака и може – за поубава животна средина за сите нас!“, рекоа од Позитива Б2.

Во рамките на „Генералка викенд“ , чија цел е подигање на свеста за значењето на заштитата на животната средина, на 9, 10 и 11 мај над 20.000 волонтери ќе чистат на повеќе од 500 локации низ Македонија.