Економското училиште со презентација пред полуматурантите

Во пресрет на уписите во средните училишта, образовните установи преку промоција и разни настани се обидуваат да го привлечат вниманието на полуматурантите и да ги придобијат како свои идни ученици. Средното економско училиште во Гостивар, реши тоа да го направи преку организирање на посебна манифестација, „Ден на кариера“. Полуматурантите и нивните родители имаа можност од прва рака да се информираат околу условите и смеровите што ги нуди школото. Освен тоа можеа и да поразговараат со претставници од бизнис секторот кои како средношколци го стекнале своето образование токму во средното економско.

„Горди сме што средното економско училиште претставува добар почеток на успешни луѓе и добар избор на идните ученици. Со изборот на економското училиште сте избрале посветеност, успех, квалитет, соработка и човечност. Нашето училиште во континуитет создава успешна приказна. Бидете дел од неа “, рече во своето обраќање, директорката Јованка Огњаноска.

На денот, посветен на градење на успешна кариера во областа на економските науки, со свои штандови и презентации, учествуваа претставници од триесетина фирми. Тие со посетителите го споделија своето искуство и ги посоветуваа околку изборот на идната професија.

Гостиварското економско училиште, во наредната учебна година може да прими  442 ученика. Предвидени се 7 паралелки на албански, 5 на македонски и една на турски јазик во смеровите: економски, банкарски или правен техничар и деловен секретар.