Експропријацијата на земјиштето за Коридорите 8 и 10д не мрднала два месеци

Целосно се завршени 58 проценти од проекциите за експропријација, како и 33 проценти од геотехничките истражувања за автопатските делници на коридорите 8 и 10д, покажува Извештајот од надзорот за прогрес на работите за периодот од 1 ноември до 31 декември лани. Процентот на експропријацијата останува ист како и во извештајот објавен во октомври, по што може да се заклучи дека процесот се одвива со потешкотии.

Извештаите кои се објавуваат на веб страницата на Јавното претпријатие за државни патишта покажуваат активности на изведувачот за експропријација, геотехнички истражувања  и други претходни активности и спецификации за предвидените автопатски делници Тетово-Гостивар-Букојчани и Требеништа – Струга-Ќафасан на Коридор 8 и Прилеп-Битола на Коридор 10 Д.

Исто така, прикажани се и финансиските трансакции помеѓу Министерството за транспорт и врски и Јавното претпријатие за државните патишта во рамките на Програмата за финансирање на патната инфраструктура, односно исплатите што завршуваат кај изведувачот на работите.

Во ноември е реализирана една трансакција во износ од 223.596.680 денари. Во декември имало исплати во четири наврати. На 5 декември се исплатени 245.606.294 денари, на 28 декември две исплати од 669.225.176, односно 261.862.793 денари,  а на 29 декември 1.695.871.044 денари.

Со Програмата за финансирање на патната инфраструктура за овој проект лани беа предвидени 15 милијарди денари, а за годинава за таа намена во буџетот на Министерството за транспорт и врски има  15,1 милијарда денари.

Договорот со изведувачот американско-турскиот конзорциум „Бехтел и Енка“ беше потпишан во март минатата година.