Екстремен топлотен бран низ Европа, луѓето се разладуваат како знаат и умеат

Деновиве поголемиот дел од Европа е зафатен од топлотен бран со многу високи температури и јако УВ зрачење.  Во текот на месецов се срушија рекордите на највисоко измерени температури во Франција, Полска, Германија, Чешка и други земји.

Според метеоролозите, тропските горештини се последица на продор на топла воздушна маса од Сахара и ќе потраат и во наредните денови.

Во  селцето Gallargues-le-Montueux, на југот на Франција измерени се неверојатни 45,9 целзиусови степени. Екстремните жештини во јужна Франција се причина и за избувнување на повеќе пожари, а огнените јазици до сега проголтале големи површини шума, како и неколку куќи и автомобили. Во Париз дневната температура достигна 37 степени, а луѓето бараат секакви начини за да се освежат и разладат на горештините: по фонтани, во реките, по парковите.

Во делови од Шпанија, четврти ден по ред владеат температури над 43 степени, поради што се издадни предупредувања со црвен метео аларм.

Во средна и северна Италија деновиве има три човечки жртви како последница на топлотниот бран .