Електромобил од рацете на тим креативци од техничкото училиште во Гостивар

Интересна, инспиративна и креативна приказна ни доаѓа од средното техничко училиште во Гостивар, кадешто група средношколци со своите професори изработија електромобил. Наспроти претставата дека училиштето се состои од лекции, книги, формули, тестови, ова е пример на нешто функционално, создадено од рацете на средношколци, производ на нивното знаење и вештини.

„Возилото функционира исто како популарните електромобили. Батеријата се полни од мрежа, има електромотор кој го придвижува задното тркало. Инаку возилото има три тркала, назад едно, а напред две. Голем број од деловите на возилото се всушност од велосипеди, електромоторот е со ланец, задниот пренос исто е од велосипед, со шалтер како 18 брзинците, но нашиот е шестбрзинец, со оглед дека напред имаме само еден погонски зупчаник. Во однос на полнењето на батеријата отидовме чекор напред, односно батеријата се полни со фотоволтаик.“, објаснува професорот Бошко Самојловски, кој го води машинскиот клуб во училиштето.

Во создавањето на електромобилот учествувал тим од триесетина средношколци, а освен Самојловски, со децата работел и професорот Борче Кироски.

Средношколците ни раскажаа дека ова им било најинтересното искуство што го доживеале до сега во училиште. Дека со задоволство поминувале повеќе часови во склопување на деловите, разменувале идеи, начини како да се изработи возилото, а уживале и во дружбата. Тоа го потврди и ученикот Петар Богданоски, кој од почеток до крај учествувало во креирањето на возилото.

Позитивното искуство го сподели и ученикот Раман Шабани, кој рече: „Задоволството беше големо, а искуството многу корисно. Се забавувавме, се дружевме, соработката ни беше супер“.

Електромобилот е всушност резултат на проект во кој е вклучено училиштето, а се вика „Инклузивни партнерства во заедниците“. „Во рамки на проектот во училиштето се формираа ученички клубови, во кои членуваат ученици од различна националност,  пол, и различни можности и способности. Машинскиот и електро клубот го изработија електромобилот, додека клубот за архитектура изработи канцелариски прибор од еко материјали. Изработките беа презентирани на завршниот настан од проектот, што се одржа на 10-ти декември во Скопје.“, појасни Зорица Момировска, специјален едукатор и рехабилитарот во училишттео, која е координатор на проектот.

Раскажувајќи ни за целиот процес на изработка на електромобилот, кој траел речиси три месеци, професорот Самојловски нагласи дека атмосферата секогаш била позитивна, учениците покажале голема креативност, а автомобилот им станала главна тема и преокупација, не само во училиштето, туку и надвор од него.

Инаку, изработката на електромобилот чинела околу 60.000 денари. Тимот од техничкото училиште во Гостивар вели дека нема да застане тука, и дека планираат во иднина да работат на усовршена верзија на возилото.