Емотивна средба во гимназијата во Гостивар-Прослава на 55 години матура

Четвртата генерација од гостиварската гимназија денес повторно го слушна училишното ѕвонче и почувствува како е да се седне во училишните клупи на својата младост. Некогашните гимназијалци одбележаа 55 години од завршувањето на средното образование. Се споделуваа сеќавања, не се криеја емоции, возбуда, радост што и по толку време, нашле начин и покажале желба да се видат и дружат. Животот ги однел на различни страни, но 55-годишнината од матурирањето ги спои и им донесе позивитна атмосфера.

Генерацијата, која матурирала во 1967-ма година најпрво се собраа во пред училиштето, го овековечија свечениот момент со заедничка фотографија, а потоа средбата ја продолжија во училница.

„Иако сме во помал број, треба да сме задоволни, ние сепак сме во трето доба од животот и многумина од генерацијата не се веќе меѓу нас. Од името на иницијативниот одбор за одбележување на матурата, ви благодарам од срце што одвоивте време и дојдовте да се видиме, собрани сме не само гостиварци, дојдоа и од Прилеп, Скопје…Нема никогаш да се откажеме и понатаму ќе одбележуваме матура, дај боже 60 годишнина да дочекаме, да бидеме здрави и живи, ви посакувам долг и среќен живот со вашите најмили“, рече Ратко Ѓиноски, еден од иницијаторите на прославата.

На собирот со едноминутно молчење им беше оддадена почит на починатите соученици, откако претходно беа прочитани нивните имиња.

Матурантите прославата ќе ја продолжуваат со заедничка веселба.