Еруптира Неапол под Везув! Наполи е шампион на Италија после 33 години

Неапол е на нозе. Наполи по 33 години е шампион на Италија. Последен кој му донесе радост на овој клуб беше легендарниот Диего Армандо Марадона, а сега тоа го направија Виктор Осимен, Квича Кварацкелија, Елиф Елмас и други..

Како гости, „наполитанците“ ремизираа 1:1 против Уденезе, но тоа беше доволно за избраниците на Лучијано Спалети да го освојат третото Скудето во историјата.

Домашните се обидоа да го расипат славјето на Наполи и добро почна за нив. Словенецот Санди Ловриќ во 13. минута го совлада Алекс Мерет. Гостите на секој начин се обидуваа да израмнат, но тоа не им успеа во првите 45 минути. Сепак, тие уште повеќе го засилија нападат во второто полувреме и го израмнија резултатот во 52. минута преку Виктор Осимен.

До крајот на натпреварот немаше промена на исходот и можеше да започне големото славје на сите кои го сакаат Наполи.

Napoli after winning the title 🎇🔵🇮🇹 pic.twitter.com/vDItiDXpQV

— Fabrizio Romano (@FabrizioRomano) May 4, 2023

Ова e трета шампионска титула за клубот од стадионот „Диего Армандо Марадона“, шест пати го освојуваше Купот на Италија, а го има и трофејот во Лига Европа (1988/1989).

На улиците на Неапол се подготвува голема прослава и не треба да чуди зошто е тоа така, бидејќи од последната титула поминаа 33 години.