Етно вешта жена во Гостивар по осми пат

Во Гостивар вчеравечер се одржа осмото издание на манифестацијата Етно вешта жена. Гостиварки се дружеа и забавуваа преку спојувањето на традицијата и вкусната храна. Годинешната трпеза беше подготвена во знакот на есенските плодови, особено јаболкото. Меѓу специјалитетите имаше пити, разни слатки, погачи и друго, сите направени по старински рецепти од умешните и вредни гостиварки.

Во манифестацијата овојпат беа вклучени и ученички од основното училиште „Единство“.

„Девојчињата со голема радост ја прифатија нашата покана да бидат дел од настанот и самите да учествуваат во подготовка на мафини. На тој начин сакавме да ги отргнеме малку од телефоните и компјутерите и да развиваат креативност. На трпезата годинава доминира јаболкото и разни специјалитети кои се прават од ова овошје.“, рече Мирјана Србиноска, од здружението Вешта жена-Гостивар.

Манифестацијата Етно вешта жена се организира со цел помладите генерации да се потсетат и поттикнат да подготвуваат јадења по традиционални рецепти кои се пренесуваат во семејствата со генерации.