ЕУ забранува пластика за еднократна употреба

По долги преговори, Европскиот парламент одлучи да ја забрани пластиката за еднократна употреба. 

Забраната важи за пластични чинии, цевки, прибор за јадење, чашки за кафе, држачи за балони и стапчиња за уши, а во иднина се очекува да се прошири и за филтрите во цигарите, кои се едни од најголемите загадувачи на плажите.

Промените би требало да стапат во сила за две години. За воведување на забраната гласаа 571 пратеник, додека 53 члена на Европскиот парламент беа против.

Како една од причините за ваквиот потег, европската комисија тогаш го наведе фактот дека 80 проценти од отпадот во морињата го сочинува пластиката што ги загрозува флората и фауната во водите бидејќи бавно се распаѓа.

Траги од пластичен отпад често се наоѓаат во труповите на настраданите животни како што се желките, китовите или птиците, како и морските плодови со кои се хранат луѓето.