Евроамбасадорот Жбогар во посета на Гостивар

Амбасадорот на Европската Унија во Македонија, Самуел Жбогар денес беше во официјална посета на општина Гостивар, каде оствари средба со градоначалникот Арбен Таравари. Како што рекоа на заедничкиот прес, на едночасовната средба во кабинетот се разговарало за проекти коишто се реализираат на гостиварското подрачје со финансиска поддршка на ЕУ, нови можности за користење на европските фондови, актуелните случувања во општината и друго.

„Чест ми е што сум денес во Гостивар, имавме пријателска средба со градоначалникот со кого се познавам и од порано. Разговаравме за проектите кои овде се имплементирале во минатото, но исто така и за проекти кои би можеле да се имплементираат во иднина. Гостивар како општина може да има многу придобивки, затоа што самата Европска Унија нуди можности за кои Гостивар може да аплицира“, изјави Амбасадорот.

Задоволство од посетата на Жбогар изрази и гостиварскиот градоначалник. „Меѓу другото Амбасадорот не информираше дека ќе има проекти кои се однесуваат на меѓугранична соработка за кои ние ќе може да конкурираме како општина во соработка со други општини, посебно од Република Албанија и Република Косово“, изјави Таравари.

Официјалниот дел од посетата на општина Гостивар, евроамбасадорот Жбогар го заокружи со потпишување на меморандум за соработка со организаицјата Метаморфозис за спроведување на проект на гостиварското подрачје.