Фасцинантен ентериер на Клементинум библиотеката во Прага, Чешка

Основан 1232 година, Клементинум во Прага е најголемиот и еден од најважните историски комплекси со објекти во стариот градски дел од Прага. Опфаќа повеќе од 2 хектари површина, а се наоѓа во непосредна близина на Карловиот мост. Клементинум може да се пофали со богата архитектонска еволуција, а покрај тоа, сѐ од средниот век па до денес, многу европски астрономи, научници, музичари и филозофи студирале и работеле тука.

Овој комплекс до 2009-та година бил дом на Националната, Универзитетската, Техничката и Градската библиотека, но последните три се преселени на други локации, па денес во Клементинум се наоѓа само Националната библиотека на Република Чешка.

Оваа прекрасна библиотека е одличен пример на барокната архитектура, бидејќи не е променета од денот кога е отворена во 1722-ра година. Ѕидовите и таванот се украсени со фрески од Џозеф Диебел, а комбинираат прикази од уметноста и науката. Сликите на куполата го претставуваат Храмот на мудроста, на ѕидовите над прозорите може да се пронајдат портрети од важни личности од исусовачкиот колегиум, а во средиштето на холот доминираат големи глобуси.

Денес во Клементинум библиотеката може да се најдат околу 20.000 книги. Повеќето се поврзани со теологијата, а некои датираат дури од 16-ти век.