Фатен осомничен по вчерашната крвава свадба во Гостивар

По вчерашниот случај на свадбена веселба во Гостивар, при кое 31 годишник заврши со повреда на вилицата, едно лице е лишено од слобода како осомничено за пукање.

Како што известуваат од полицијата, по овластување на јавен обвинител бил извршен комплетен увид, биле пронајдени и подигнати повеќе траги за вештачење, а 58 годишен жител на Долна Бањица е лишен од слобода, поради сомнение дека сторил кривично дело „предизвикување на општа опасност“. Од лицето бил одземен пиштолот, од кој се претпоставува дека е пукано. Осомничениот немал дозвола за негово поседување. Допрва ќе се истражува дали повредата е нанесена точно од тој пиштол.

Настанот се случи вчера околу 15 часот  на семејна веселба, во двор на улица „Мара Угринова“. Испуканиот куршум се одбил од асфалтната површина и го повредил 31-годишникот од селото  Тумчевиште.

Со оглед на тоа дека започна сезоната на свадбени и други семејни свечености полицијата апелира апелите до граѓаните да се воздржат од пукање со оружје, но и од неовластено приредување на огномети.  „Пукањето е спротивно на Законот против јавниот ред и мир и глобата за овој вид прекршок се движи од 200 до 500 евра во денарска противвредност. Зависно од околностите и крајните последици, пукањето може да претставува и кривично дело за кое е предвидена и затворска казна од една до пет, односно десет години“, предупредуваат надлежните.

На граѓаните од Полошкиот регион, исто така, им се укажува огнометите задолжително да ги пријавуваат во најблиските полициски станици или одделенија, на подрачјето на кое се организираат, а нивните организатори однапред да ги применат сите законски предвидени заштитни мерки.