Фатено лице кое крадело велосипеди низ Гостивар

Не ги оставајте велосипедите и мопедите необезбедени и незаклучени, затоа што лесно може да станат мета на крадци, предупредуваат од полицијата. Вешти крадци во Гостивар го користат невниманието на граѓаните и брзо и лесно им ги одземаат „милениците на две тркала“. Најпривлечни им се полуксузните и поскапи велосипеди, но посегнуваат и по било каков што ќе им се најде при рака.

Полицијата вчера, рано наутро во Гостивар привела лице поради кражба на велосипеди. СВР Тетово соопшти дека на 4 септември околу 5 часот на улица „Браќа Ѓиновски“ полициски службеници од Одделението за внатрешни работи Гостивар го лишиле од слобода 19 годишниот Х.Н. поради сомнение дека е извршител на повеќе кражби, најмногу на велосипеди. Полицијата извести дека по документирање на случајот, против лицето ќе биде поднесена соодветна пријава.

Надлежните апелираат доколку граѓаните забележат сомнително однесување и постапки на непознати лица во близина на нивните згради, дуќани и слично, да пријават за да се спречат и расветлат кражби и други криминални активности.