Феминистичко движење во Холандија именува улици по познати жени

Околу 88% од улиците во Холандија носат имиња на мажи, па затоа едно феминистичко движење се одлучило неофицијално да им даде на улиците име по некоја позната жена. Опфатени се жени истакнати во различни области: револуционерки, математичарки, писателки, политичарки и музичарки.

De Bovengrondse е феминистичка група која поставила нови имиња на 40-тина улици во 11 градови во Холандија. Таблите со женските имиња, биле поставени под оригиналните табли.

Меѓу жените почестени една холандска улица да се нарече според нив се пејачката Бијонсе,  писателката Мери Волстонкрафт, математичарката Ада Ловлејс. Целта на движењето било да се покаже дека низ европските градови скоро никаде не може да се видат улици со женски имиња, или ако ги има тогаш се имиња на божици или сопруги на популарни мажи.

Активистките на De Bovengrondse сметаат дека нивната акција може да биде нешто повеќе од уличен проект, со оглед на тоа што нивните истражувања покажале дека 70% од цитираните експерти низ медиумите се мажи, а отприлика толку е процентот и на гостите од машки пол кои се покануваат на дебати во медиумите.