Февруарска седница на Советот на Гостивар-Одлуки за задолжување, легализација и именувања

Советот на Општина Гостивар на денешната седница донесе неколку одлуки од различни области. Дневниот ред на февруарското состанување на советот беше краток и точките беа усвоени без дебати и дискусии.

Советниците изгласаа одлука за долгорочно домашно задолжување на општината во рамки на Проект за енергетска ефикасност во јавниот сектор. Како што појасни секретарот на Општина Гостивар, Зоран Крајоски се работи за рутинска постапка која се бара од надлежните институции и за која веќе Советот дал согласност лани, но поради промена на динамиката на процедурите неопходно е иста одлука да се донесе и годинава. Инаку, проектот предвидува општинската зграда да стане енергетски ефикасна со термофасада, нови прозори и сл.

На седницата беа усвоени и одлуки од областа на урбанизамот, како и за разрешување и именување на членови на Управни одбори на две училишта и на Надзорен одбор за контрола на материјално-финансиското работење на Јавно претпријатие за јавни паркиралишта и зеленило Гостивар.

Како што претходно објавивме со обојување на дланките во разни бои, советниците дадоа симболична поддршка на лицата со ретки болести во пресрет на 28 февруари, Светскиот ден на ретките.

„Ретко значи да талкаш по дијагнозата со месеци, некогаш и со години. Ретко е да мора да им ја објаснуваш својата болест на луѓето затоа што мислат дека ја измислуваш. Ретко е кога секој ден е борба за да се завршат секојдневните обврски. Ретко е кога не можеш да ја планираш иднината. Да им дадеме безрезервна поддршка на лицата со ретки болести, да се осврнеме на нивните проблеми и да ги охрабриме“, рече во своето обраќање советничката од ВМРО ДПМНЕ, Анета Ќироска, претседателка на Комисијата за еднакви можности.

Со оглед дека во сабота (1 март) за муслиманските верници почнува рамазанскиот пост, од говорницата се обрати советничката на ДУИ, Вјолца Бафтиу Зулбеари повикувајќи на взаемна почит, обединетост, хуманост и ширење добрина.