Филипче: Ќе донесам одлука дали ќе поднесам оставка кога ќе заврши истрагата

Министерот за здравство Венко Филипче попладнево за прв пат даде изјава во јавноста, по трагичниот пожар во Тетово во модуларната болница, во кој загинаа 14 лица. Министерот прес конференцијата ја започна со извинување што доцна излегува со изјава, а причината за тоа е како што рече потребата да соберат што повеќе релевантни информации. „Се‘ уште трае истрагата и затоа замолувам да имаме трпение и да ги сочекаме наводите. На денешната седница на Владата донесоваме одлука да се вклучат и експерти од странство, заради потемелна истрага и барам сите наоди уредно да бидат презентирани во јавноста“, рече министерот.

Во однос на поднесување оставка од функцијата прв човек на здравство, Филипче изјави:

„Да кажам дека не бегам од одговорност, но ќе инсистирам и ќе чекам да заврши истрагата. И овој период ќе има потреба од менаџирање на кризата, посебно со пациентите во Тетово, завршување на обдукциони наоди итн, и по завршување на истрагата ќе донесам одлука, дали ќе поднесам оставка. Тешко е да се опише со зборови тежината и болката што ја осеќам, сочувствувам со членовите на смејствата, но ќе ги чекаме официјалните наводи на истрагата. Не бегам од одговорност ниту од наводите од истрагат, ниту од моралниот момент“.