Филипче: Полициски час моментално не е потребен и нема ништо да донесе

Министерот за здравство Венко Филипче одговарајќи на новинарско прашање, дали се размислува за воведување на поостри мерки за заштита од коронавирус, одговори дека за сега нема потреба од полициски час, а актуелните мерки даваат резултати.

„Секојдневно ги анализираме бројките, ги споредуваме и поврзуваме со времето пред да се имплементираат актуелните мерки. Пред една недела беше регистриран најголем дневен број на новозаразени, близу 1.400 и од тогаш постепено се намалува. Тоа се чувствува и од притисокот врз болниците, кој се уште е голем, но бројот на слободни кревети не се намалува како претходно. Сегашните мерки очигледно даваат резултат. Ние цело време размислуваме за дополнителни мерки, но сметаме дека сега нема потреба да се препора ништо дополнително. Полициски час после 20 часот нема ништо да донесе,  и така надвор периодов е поприлично празно, постудено е, угоститески објекти се затворени, забрането е групирање. Ризик се групирањата во домашни услови, нешто за кое веќе постои препорака да не се прави, забрана нема затоа што е противуставно. Што значи останува на свеста на граѓаните.“, рече министерот со апел мерките да се почитуваат: „Епидемијата го достигна пикот пред една недела и бројките се стабилизирани. Се стабилизира бројот на активни случаи, што е многу позитивно. Апелирам до граѓаните да разберат дека во оваа состојба вирусот ќе опстане и широко е распространет, за секој од нас е ризик и мерките мора да се почитуваат.“