Филипче во Србија: „Торлак“ ќе биде наш стратешки партнер за набавка на вакцини

Министерот за здравство Венко Филипче денес е во посета на Србија и Институтот „Торлак“, каде отпочна производство на руската антиковид вакцина Спутник. Филипче оствари средба со српскиот колега Златибор Лончар, на која како што изјави било договорено стратешко партнерство за набавка на вакцини.

„Во рамки на мојата посета на соседна Србија и Институтот Торлак, се сретнав со министерот за здравство Лончар. Разговаравме и договоривме соработка во повеќе области, но најважен е договорот Институтот Торлак да биде наш стратешки партнер што се однесува на набавка на вакцините во периодот кој е пред нас. Многу е веројатно дека оваа пандемија нема туку така да запре, многу е веројатно дека оваа вакцина ќе стане сезонска. Со ваквото партнерство обезбедуваме долгорочна соработка и стабилен извор на вакцини.“, изјави министерот кој најави дека сите српски граѓани ќе бидат ослободени од плаќање на патарини во нашата земја од 15 јуни до 15 август, во знак на благодарност за претходно донираните вакцини.

„Благодарение на министерот Лончар, премиерката Брнабиќ и посебно претседателот Александар Вучиќ, преку донацијата на вакцини од Србија ние го започнавме процесот на имунизација кај нас. Заради овој пријателски гест, Владата на Република Северна Македонија донесе одлука да ги ослободи од плаќање на апарина сите српски граѓани од 15 јуни до 15 август“, рече министерот.