Филипоски: Ја извадивме државата на прав пат, можеме уште подобро во следните 4 години

„Денес СДСМ и Коалицијата Можеме ја започнуваат здравствено безбедната кампања преку која на гласачите ќе им ја претставиме нашата понуда за овие избори. За три години СДСМ и Владата што ја предводи покажаа одговорност, решителност и визија во решавањето на проблемите на граѓаните и државата. Направивме пресврт на подобро, државата ја извадивме на прав пат, општеството напредува на секое поле. Сега е време за нови иницијативи на кои се обрзуваме, пред граѓаните, но и пред себеси. Ние знаеме дека заедно со граѓаните, можеме да постигнеме уште повеќе и уште подобро.“, истакна на прес конференција за почеток на предизборната кампања, денес во Гостивар кандидатот за пратеник на СДСМ во шестата единица од овој град, Драгољуб Филипоски.

Тој напомена дека се направени инвестиции во здравството, се дава поддршка на економијата, претприемништвото и на младите таленти.

„Нудиме нова македонска развојна економија, заснована на нови технологии, одржливост и човечки капитал. Модел што ќе ги штити работните места на граѓаните, ќе генерира повисоки плати и подобри работни места. Модел што дава нови и подобри шанси за сите. Модел што нуди стабилност за нашите деца и идните поколенија. Создаваме средина во која младите ќе го јакнат претприемачкиот дух, иновациите и креативноста. Влеговме во НАТО – можеме и во ЕУ! Тоа значи сигурна иднина за сите нас и за сите наши деца и гарантиран брз економски развој, затоа што добиваме пристап до пазар од 4 милијарди евра годишно.“, рече Филипоски додавајќи дека политичките опоненти немаат визија и водат деструктивна политика: „Од другата страна е ВМРО-ДПМНЕ, партијата предводена од Христијан Мицкоски, партија без став за ниту едно важно прашање, партија заглавена во режимската матрица од која ниту сака ниту може да излезе. Тоа е партија, водена од збунет, неодговорен и незрел политичар, кој не знае економија, кој е посветен само на деструкција, чиешто однесување е опасност за државата.“.