ФК Генч Калемлер испадна од 2 МФЛ – ФК Гостивар одигра нерешено со Кораб

На коло до крајот на Втората македонска фудбалска лига – Запад, екипата на ФК Генч Калемлер ги загуби шансите за опстанок во лигата. После поразот викендов од директниот конкурент за опстанок од Тетекс во Тетово, гостиварци и математички ги загубија шансите за опстанок.

Иако, први го отворија резултатот и преку голот на Алији имаа водство од 0:1, екипата од Долна Бањица не успеа да ја задржи предноста до крај, во самиот финиш на натпреварот со двата гола на Зеќири, екипата на Тетекс се избори и наредна сезона да игра во 2МФЛ. Избраниците на Бирол Топчиу, имаа запазена улога во есенскиот дел од првенството, дури кратко беа и лидери на табелата, но слабите резултати во вториот дел ја доведоа екипата во опасната зона. Во последното коло Генч Калемлер ќе ја пречека екипата на Пелистер.

ФК Гостивар на домашен терен играше со екипата на Кораб од Дебар, првото полувреме помина мирно без возбудувања. Поведоа домаќините во 73. минута со голот на Рамадани, но радоста траеше само 4 минути, гостите изедначија во 77. минута, натпреварот заврши 1:1. Гостивар се наоѓа на 6. позиција на табелата која е во сигурна зона, но и оваа сезона нема да има прволигашки фудбал во Гостивар, во повисок ранг и бараж одат струшките екипи Струга Трим лум и Лабуништа 2011. Во последното коло ФК Гостивар ќе игра со Гоблен Јуниор во Куманово.