ФК Гостивар исфрлен во најнизок ранг на натпреварување

Фудбалската федерација на Македонија денеска ја соопшти одлуката за дисциплински мерки против клубовите ГФК Гостивар АД и ФК Воска Спорт АД, поради неодиграните натпревари од последните две кола во Првата МФЛ.

– ГФК Гостивар АД се казнува со одземање на 9 (девет) бодови и парична казна во износ од 25,000.00 евра за неодигрување на натпреварот од 30. коло, идентична е казната и за неодигрување на натпреварот од 31. коло во Прва МФЛ;

– ФК Воска Спорт АД се казнува со одземање на 9 (девет) бодови и парична казна во износ од 25,000.00 евра за неодигрување на натпреварот од 29. коло во Прва МФЛ, за неодигрување на натпреварот од 30. коло, ФК Воска Спорт добива казна, одземање на дополнителни 9 (девет) бодови и парична казна во износ од 25,000.00 евра;

По правосилноста на овие одлуки, екипите на ФК Воска Спорт АД и ГФК Гостивар АД ќе бидат исфрлени во најнизок ранг на натпреварување со забрана за учество во натпреварувачката сезона 2025/2026, се вели во соопштението на ФФМ.

Дополнително, Федерацијата најави дека ќе ги искористи сите можни механизми да ги врати, наплати, наменските средства во износ од 150,000.00 евра, паричен износ кој ФК Воска Спорт АД ги доби на 10. април 2025 година преку солидарната шема за тековната сезона 2024/25.