ФК Гостивар започна со подготовките за пролетниот дел од првенството

Гостиварскиот претставник во Втората македонска фудбалска лига, екипата на ФК Гостивар денес ги започна подготовките за пролетниот дел од првенството, откако новиот тренерот на гостиварци Бирол Тобчиу ги построи своите фудбалери и го одржа првиот тренинг.

Меѓу играчите на првата прозивка се најдоа и неколку нови имиња Енсар Лума, Хасип Локи, Бесар Реџепи, Џемаил Есати и Мусли Лика се најновите инвестиции на клубот со чиј ангажман се очекува остварување на зацртаните цели.

Претседателот на ФК Гостивар, Влерим Исени открива дека ова не се единствените засилувања, во следните денови се очекуваат уште неколку фудбалери кои ќе се преселат во гостиварскиот клуб.

„Денеска започнаваме со подготовките за пролетниот дел од сезоната. Првиот дел од припремите до 8 февруари ќе ги одработиме во Гостивар, а потоа во план е да продолжиме на некое потопло место. Во зимскиот преоден рок ангажиравме петмина нови фудбалери, но не застануваме тука деновиве ќе има и нови засилувања“, изјави Исени.

ФК Гостивар презими на шестата позиција на табелата во западот со 19 бода, осум помалку од лидерот Пелистер, а шест во однос на второпласираниот Велазерими 77.