Фудбалерите и ФК Гостивар во хумана акција за помош на загрозени семејства

Посветени на спортот, но не ја забораваат и хуманата страна. Фудбалерите на ФК Гостивар се вклучија во хуманитарни активности за помош на социјално загрозени семејства. Клубот одлучи да ја обезбедуваи сета потребна храна за сиромашните семејства, корисници на народната кујна „Дава“, во период од една недела, а фудбалерите денес заедно со спортскиот директор, Мухамед Исмаили беа во кујната и помагаа во дистрибуција на оброците.

„Сиромаштијата што не‘ зафати, не може да не‘ остави рамнодушни. Енес Устаи, кој раководи со клубот, е хуман човек и покажува грижа за сите, затоа одреди да се спроведе „недела на хуманоста“. Активностите ги почнуваме од „Дава“, преку која ќе ја обезбедиме  храната за загрозените семејства кои се нивни корисници, а во делењето ни се вклучени и нашите фудбалери, кои секогаш се подготвени да помагаат и да изразат хуманост. И светски популарните фудбалери се познати по добтотворни цели.“, рече Исмаили, најавувајќи дека утре на градскиот стадион ќе имаат дополнително делење на 70 хуманитарни пакети.

Претседателот на „Дава“, Муса Хусеин им се заблагодари на поддршката.

„Сега во овие кризни моменти секако расте бројот на луѓе кои имаат потреба од помош. Најважно ни е да им најдеме работа на оние кои се способни за работа. За да може сами да си обезбедуваат основни потреби. Од гостиварскиот фудбалски клуб не‘ контактираа и ги подмирија трошоците на нашата кујна за една недела, за што им благодариме многу. Ќе повториме дека не прифаќаме пари, но донаторите ни обезбедуваат прехранбени продукти во износ што решиле да го донираат“, изјави Хусеин.

Народната кујна „Дава“ секојдневно обезбедува храна за околу 400 социјално загрозени граѓани.