• Дата: 21/12/2017

ГАКУД „Браќа Ѓиноски“ ја заокружи годината со концерт

 

Членовите на културно уметничкото друштво „Браќа Ѓиноски“ пред домашната публика во Центарот за култура АСНОМ го одржаа завршниот годишен концерт. На програмата се најдоа сплетови на ора и песни Беранче, Водарки и Тресеница, а свој солистички настап имаа и членовите на друштвото Перо Пандилоски и Анѓела Фичуроска.

„Иако главен ни е традиционалниот мелос, се трудиме да ги следиме актуелните музички текови и сето тоа го пренесуваме на концертите. Во оркестарот има навистина квалитетни музичари кои добро го владеат својот инструмент“, рече Анѓел Анѓелкоски, шеф на оркестарот на „Браќа Ѓиноски“

Кореографот Предраг Ристески, задоволен од настапот на играорците откри дека во 2018-та година ќе остварат важно патување во Полска.

„Веќе ги правиме плановите за следната година. Планираме да го збогатиме репертоарот, да реализираме повеќе настапи и гостувања во странство. Традиционално ќе одржиме концерт во Бугарија, а за прв пат ќе се претставиме и во Полска“, рече Ристески.

Друштвото ги бележи своите почетоци уште пред Втората светска војна, кога неколку гостиварци под името Шивачки се собрале за да ги негуваат традиционалните вредности и градските навики. Првиот официјален настап на друштвото датира од 1950-та година, а се одржал во старата гостиварска Соколана.