Германците денеска гласаат на предвремени парламентарни избори

Граѓаните на Германија денеска гласаат на предвремените парламентарни избори, кои беа предизвикани од распадот на владејачката коалиција на канцеларот Олаф Шолц во ноември минатата година. Ова се четвртите вонредни избори во земјата од Втората светска војна.

Гласачките места беа отворени во 8 часот по локално време и ќе останат отворени до 18 часот. Повеќе од 59 милиони граѓани со право на глас денеска ќе изберат 630 пратеници во новиот состав на Бундестагот, кој ќе има четиригодишен мандат и ќе ја формира идната влада.

Според анкетите, конзервативната Христијанско-демократска унија (ЦДУ) и нејзината сестринска партија Христијанско-социјалната унија (ЦСУ) се во водство со околу 30% поддршка. Нивниот кандидат за канцелар, Фридрих Мерц, се смета за најсериозен претендент за нов лидер на Германија.

Екстремно десничарската Алтернатива за Германија (АфД) е втората најпопуларна партија со околу 25% поддршка, но ниту една друга партија не најави подготвеност да соработува со неа, што значително ги намалува нејзините шансите за учество во владата. АфД сака да ја напушти ЕУ, да ги укине мерките за климатските промени, да изгради нуклеарни централи и да ги поправи гасоводите и односите со Русија.

Како што јави ДВ, Германија ќе се соочи со комплицирано формирање влада. Во зависност од резултатите од денешните избори, формирањето влада може да биде голем предизвик.

По затворањето на гласачките места во 18 часот, ќе бидат објавени резултатите од излезните анкети, додека првите официјални проекции се очекуваат во текот на изборната ноќ.