Германската Амбасада донираше апарати за гостиварската болница

Нови апарати за интерното и за детското одделение во општата болница „Ферид Мурад“ во Гостивар изминатиот период се обезбедени преку донација на Амбасадата на Германија во Македонија. Интерно се поднови со дефибрилатор и нов ЕКГ апарат, додека во детското одделение поставена е дигитална вага за мерење на доенчињата при контроли и прегледи.

По тој повод денес во посета на болницата беше германскиот Амбасадор Томас Норберт Герберих. „Сакав лично да ја видам имплементацијата на еден од нашите мали проекти, мали грантови преку кои беа обезбедени апарати за болницата. Се радуваме што овој проект е успешно спроведен и подготвени сме и понатаму да пружаме ваков вид на поддршка“, изјави Амбасадорот.

Норберт Герберих претходно ја посети општина Гостивар каде оствари официјална средба со градоначалникот Арбен Таравари. „Разговаравме за проблемите и приоритетите во општината. Го запознав Амбасадорот со проблемите кои ги имаме со Советот како и за проектите во кои е вклучена Република Германија преку нивните банки кои помагаат за проекти како филтер станицата, потоа депонијата Русино која треба наскоро да започне со работа и слично“, рече Таравари.

Во болничките одделенија периодов има полни раце работа. На интерното одделение во текот на јануари за помош се обратиле над 640 пациенти.