Кој ги пустоши црквите во гостиварско?

Серијата на кражби во светите храмови на поширокото гостиварско подрачје, продолжи и викендов. Крадци влегле во две цркви и ги зеле парите што верниците ги оставаат за здравје. И овојпат не се работи за голема сума на пари, но јавноста е вознемирена поради фактот што станува збор за кражби во верски објекти, кадешто граѓаните одат за духовен мир и молитва.

Викендот што измина пријавени се два случаи. Првиот во црквата „Св.Никола“ во селото Маврово. За сега непознати сторители насилно ја отвориле влезната врата и одзеле 150 денари и 600 албански лека(околу 300 денари). Парите биле оставени на икони и на местото од кадешто се купуваат свеќи. Слична кражба е пријавена и во храмот „Св.Кирил и Методиј“ во Маврови Анови. И таму крадците насилно ја отвориле влезната врата и ги однеле парите од верниците, околу 200 денари. Освен тоа предизвикале и материјална штета, која е поголема и од самиот плен.

Од почетокот на годината до сега, низ населените места од гостиварско и во мавровскиот крај, регистрирани се седум кражби во цркви.