Гимназија Гостивар – Моето училиште пример за еколошки град

По повод Светскиот ден на екологијата, 21 март, во гимназијата во Гостивар беше организиран еко настан и изложба на изработки од рециклирани материјали, под мотото „Моето училиште пример за еколошки град“.

„Денешниот настан е во рамки на двомесечен проект, чија главна цел е подигнување на еколошката свест на средношколците за важноста на селектирањето, рециклирањето и реупотребата на материјалите.“, објасни професорката Валентина Штерјоска, координатор на активностите.

На настанот присуствуваше и градоначалникот Арбен Таравари, со своите соработници и директорите на гостиварските јавни претпријатија, Исак Лазами и Беким Челебиу. Гимназијата од општината доби канти за селекција на отпад.

„ Ако од некаде треба да се започне со примарна селекција на отпад, тоа се училиштата. Како во гимназијата, така и во другите училишта поставуваме канти за селекција на отпадот, има за електронски отпад, стакло, железо, хартија. Во светот велат дека отпадот е богатство, и успеваат да го соберат, селектираат и продадат. Така и ние како општина, одредени материјали од отпадот ќе ги продадеме и ќе вратиме како инвестиција.“, рече градоначалникот.

Проектот на гимназијата ќе продолжи со кампањата при која еко патроли ќе избираат најчиста училница, која ќе биде соодветно наградена.

Активности за одбележувањето на Денот на екологијата, беа организирани и во средното економско училиште, кадешто дворот на училиштето се поднови со нови цвеќиња.